ကလေးငယ်များနှင့် အမျိုးသမီးများ သေဆုံးခဲ့ရသည့် ထန်တလန်ဗုံးကြဲတိုက်ခိုက်မှု ချင်းပြည်နယ်၊ ထန်တလန်မြို့မြောက်ဘက် ခြောက်မိုင်ခန့်အကွာရှိ ခွာဖိုးရွာထဲကို စစ်ကောင်စီတပ်က မတ်လ ၃၀ရက် နံနက်ပိုင်းတွင် လေကြောင်းမှ ဗုံးကြဲတိုက်ခိုက်မှုကြောင့် ကလေးငယ် ၃ဦးနှင့် အမျိုးသမီး ၅ဦး စုစုစပေါင်း အရပ်သား ၈ဦး သေဆုံးခဲ့ရသည်။ ဒဏ်ရာရရှိသူ ၁၀ဦးအနက် အချို့မှာ ဒဏ်ရာပြင်းထန်သည်။ ဗုံးဒဏ်ကြောင့် နေအိမ်အချို့နှင့် ခရစ်ယာန် ဘုရားကျောင်းတစ်ခုလည်း ထိခိုက်ပျက်စီးခဲ့ရသည်ဟု ချင်းအမျိုးသားတပ်မတော် CNA ပြောရေးဆိုခွင့်ရှိသူက ပြောကြားသည်။ “အကြမ်းဖက်မင်းအောင်လှိုင်က တပ်မတော်နေ့မှာ ကျွန်တော်တို့ NUG နဲ့ ပံ့ပိုးနေတဲ့ တိုင်းရင်းသားလက်နက်ကိုင်တွေကို ပြတ်ပြတ်သားသားအရေးယူဆောင်ရွက်မှု လုပ်မယ်ဆိုတာ ကိုယ့်ပြည်သူကို ရက်စက်ပြတာ။ တကယ့် စစ်ရာဇဝတ်မှု ကျူးလွန်တာပဲ ဖြစ်တယ်။ အဲ့ဒါကြောင့် အဲ့ဒီကိစ္စနဲ့ ပတ်သက်ပြီးတော့ သူက ကျွန်တော်တို့ကို ဘယ်လောက်ပဲ အဲ့ဒီလိုလုပ်နေပါစေ၊ ကျွန်တော်တို့က ဆက်လက်ပြီးတော့ ခုခံတွန်းလှန်မယ်” ဟု ဆလိုင်းထက်နီက Myanmar Now ကို ပြောသည်။ သတင်း၊ တင်ဆက် - ခင်ရီရီဇော်၊ လင်းထင် (လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/registe... နှိပ်၍ လှူဒါန်းနိုင်ပါသည်)
