Khit Thit သတင်းဌာန၏ ဖေဖော်ဝါရီ ၂၀ ရက် နေ့လယ်ပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ဖေဖော်ဝါရီ ၂၀ရက် နေ့လယ်ပိုင်းတင်ဆက်ပေးမယ့်သတင်းတွေကတော့ - စစ်ကိုင်းတိုင်း၊ ရွှေဘိုမြို့နယ်၊ မန်ကြီးသုံးပင်ရွာ အရှေ့ဘက်က တောင်လှတောင်ပေါ်ကို စစ်ကြောင်း ထိုးလာတဲ့ အကြမ်းဖက်စစ်ကောင်စီ စစ်ကြောင်းကို ပြည်သူ့ကာကွယ်ရေးတပ်ဖွဲ့တွေကနေ ဖေဖော်ဝါရီ ၁၉ ရက်နေ့က ဒရုန်းနဲ့ ဗုံးကျဲ တိုက်ခိုက်ရာမှာ စစ်ကောင်စီတပ်သား ၃ ဦး သေသွားတယ်လို့ ရွှေဘိုခရိုင် အမှတ် ၂၃ တပ်ရင်းဆီကနေ သိရပါတယ်။ - စစ်ကိုင်းတိုင်း၊ ရွှေဘိုမြို့က မြန်မာ့ရှေ့ဆောင်ဘဏ်ရှေ့မှာ ဘန်ကာဆောက်ပြီး စောင့်နေတဲ့ အကြမ်း ဖက်စစ်ကောင်စီတပ်သားတွေကို ဖေဖော်ဝါရီလ ၁၉ ရက်နေ့က ပြည်သူ့ကာကွယ်ရေးတပ်ဖွဲတွေကနေ ဗုံးပစ်တိုက်ခိုက်ခဲ့ရာမှာ စစ်ကောင်စီတပ်သား ၂ ဦး ပြင်းထန် ဒဏ်ရာ ရသွားတယ်လို့ Buffalo Soliders Freedom Force တပ်ဖွဲ့ကနေ ရန်ကုန်ခေတ်သစ်ကို ပြောပါတယ်။ - စစ်ကိုင်းတိုင်း၊ ဆားလင်းကြီး နဲ့ ယင်းမာပင် မြို့နယ်အစပ်က ကျောက်မျက်တောင်မှာရှိတဲ့ အကြမ်းဖက် စစ်ကောင်စီတပ်ရဲ့ စခန်းငယ်ကို PDF တပ်ဖွဲ့တွေကနေ ဖေဖော်ဝါရီလ ၁၉ ရက်နေ့က သိမ်းပိုက်ရရှိခဲ့တဲ့ သတင်းအပါအဝင် နောက်ဆုံးရသတင်းတွေကိုတင်ဆက်ပေးပါမယ်။
